Ｐａｎａｓｏｎｉｃ ＧＤ９０，我既第一部手機。雙色ｍｏｎ，超輕。約莫係我讀緊小學五六年班買架，用咗我三千二百蚊。但唔知點解一個小朋友，明明無需要用手機，買黎做乜呢？好可能只係為咗威！結果……用無幾個禮拜，益咗潘師奶啦。
第二部，Ｍｏｔｏｒｏｌａ Ｔ１９１，超細部直身機。係我讀中一二咁上下時間買返黎。係我讀中三嗰年，天線失蹤不特止，有次學校冬季旅行去沙灘玩，部機覺得熱得滯，自己跳咗落海玩水呀！佢從此就同我永別了……
第三部係雜嘜ＤＢＴＥＬ（但當年係鄭秀文做代言人＠＠），型號係乜我都唔記得，第二任男朋友當生日禮物送俾我既。
係Ｔ１９１捨我而去之際，婆婆知道我無咗手機，就話一直無買過Ｄ咩俾我，就送部新Ｓｏｎｙ Ｅｒｉｃｓｓｏｎ Ｚ６００手機俾外孫女啦～結果我同時有兩部手機了。
第五部係Ｎｏｋｉａ ３２３０，正確黎講又唔係我既，係亞哥既。不過佢買返黎無一個月，已壞機，我幫佢拎去整，１０日內換咗兩次底板（就係呢個經歷，令我對Ｎｏｋｉａ既手機印象好差，無論亞哥點幫佢講好說話，我都唔聽！梗係，整機都係煩著我，我哥又唔會去維修中心，次次都要我去排隊，話我返學近Ｎｏｋｉａ維修中心喎！咁又真係幾近既，係正樓下……），之後亞哥嬲嬲地無再用，擺係我度，我玩咗佢一個月，就俾亞哥ｔｒａｄｅ咗嚕～（當年佢既賣點係多ｇａｍｅｓ玩，所以係我手上期間，只係用黎打機，無通過話，哈哈）
第六部係Ｓｏｎｙ Ｅｒｉｃｓｓｏｎ Ｚ５３０ｉ，正正係亞哥ｔｒａｄｅ咗３２３０後買既手機，當後備機，所以好少用，我就間唔中拎黎用下，所以都唔算係我既。
第七部係Ｓｏｎｙ Ｅｒｉｃｓｓｏｎ Ｗ８５０ｉ，０６年買既ｗａｌｋｍａｎ手機囉，聽歌唔錯呀～水貨機，用咗三年有多，虧到爆至換咗。
第八部，係人家０８年１２月送我的生日禮物，令我嬲嬲地既ＬＧ ＫＦ３５０雪糕手機。只用咗兩日，頂唔順佢既差，趁市面上缺貨，上Ｙａｈｏｏ！拍賣賤價賣了。（從此我唔再希望人地亂買手機俾我）
第九部，Ｓｏｎｙ Ｅｒｉｃｓｓｏｎ Ｗ５９５，都係ｗａｌｋｍａｎ手機，０９年初買入，用到至今（三年有多），又係頻死邊緣。
最後，第十部，Ｎｏｋｉａ Ｘ３－０２，琴年買黎返大陸做野用，順便當係士啤機，唔覺唔覺，用咗都差不多一年，蠻好的。總結：十多年間，經過我手既手機只有十部，但我真正有用到既卻只有７部，其實我真係好慳。大把人年年換機，我算係古老石山了。
23:51
21 Mar 2012
PS 唔知大家有無發現, 我既手機, 全係有樣無功能? 哈哈哈, 無錯, 我對手機無研究, 所以只會貪個款, YEAH~ 呵呵~
