無錯，睽違兩年，我又上返水，蒲一蒲頭啦～😁
首先公佈一下我嘅工作情況，經過我努力不懈咗兩年，我係舊年終於成為咗公務員啦，目前已做咗超過一年，已跳咗一次point，我深懷感恩。係考公務員嘅路上，一直都有好多人支持我，佢哋個個都好睇好我，而我亦相信自己一定得㗎，然後得咗！
好，去返正題，如標題所示，我係要講我今日居屋揀樓嘅事。
無錯，我人到中年後，人生兩大目標都先後相繼落成了，真係柳暗花明又一村，終於捱到見曙光了。
毫無疑問，居屋，我係每年都apply㗎啦，所以居屋2024我當然亦唔會錯過，我同自己講，每年都揼幾嚿水出嚟申請，就當買一張好貴嘅六合彩啦，雖然就年年都得個桔，都桔咗十年了⋯⋯嗰家PK搬入嚟幾耐，我就抽咗幾耐。
今次嘅居屋，唔係美容師同我講：喂，攪咗珠啦，妳睇咗未呀？我唔中囉😂。我都無為意過，原來攪珠了。
我當其時真腦海一片空白。🙈
但我又好快清醒過來，知道仍然要睇第二朝9點公佈嘅最後揀樓次序至知有無機。
然後，極之符合我黑仔王嘅人設，我係WS000475，啱好在配額之外，真係中頭籌都唔一定有L用。😂😂😂
好，接下來，等做審查，交完審查等開始揀樓，開始揀樓後又要日日𥄫住家庭隊嘅揀樓情況⋯⋯
我係網上討論區睇到好多巴絲越嚟越焦慮，我就相反，越嚟越無感。可能係一開初加埋屋企嘅事，自身嘅事，統統炒埋一碟，我首次體驗到焦慮症係咩一回事。😖
但我內心真的很強大，慢慢就恢復過來了。
與其焦慮，還不如好好做準備，我真係做咗好多research、刨咗好多資料。到越來越接近我嘅揀樓日，我內心係毫無波瀾。
後來，一場黑雨，一人隊揀樓仲要順延添。你老味，攞大假銷大假玩死我，打亂我嘅公事。
原先我以為家庭隊配額實會用曬啦，點不知有剩，仲剩咗相當多數量流到落一人隊，幾乎係double咗一人隊嘅配額，我嘅希望真係返曬嚟。
仲唔止呀，我一度以為我只有大開則戶型得揀時，討論區嘅人點出一個重點：離島仲有過百間一房戶型喎。
哇，咁真係好不得之了，我要馬上變陣，唔要安達臣嚕，eye on東涌先，秉承住有大買大嘅"中指"做人實無死錯人。
所以，我係短短幾日間，至開始研究東涌嘅居屋，之前一路只睇安達臣。😅排好曬之後，就心驚膽戰咁mon住第一日一人隊揀樓嘅銷情，個人都有啲灰灰地，我係第二日第三節揀樓，極之尷尬嘅時段，前兩節賣咗啲乜未必睇到，但後面又仲有一節趕住過場，又唔知同一節有幾多人响我前面，埋到位真係無時間畀我諗嚟諗去。😩
我12點揀樓，但我早早11點就去到咗樂富揀樓中心睇大電視（但其實再之前6月初，啱開售初期，我已專登請過半日大假落現場感受過，絕對well-prepared我自己）。我以為我會緊張、會心跳加速，結果係無嘅。我情緒之平穩，絕對係人類界嘅馬卡巴卡。😂
係揀樓中心，11:45就開始排隊準備登記入場。登完記，聽簡報會，然後報號⋯⋯
哇！我竟然係呢一節嘅白表第一人，個天未要我亡。😭
到報完號，開始一綠一白咁請買家埋櫃位lock單位時，我feel到我一起身已萬眾矚目😅。埋到櫃位，我2秒就報出我要咩單位，然後個主任30秒內就打好張單畀我，話：小姐，妳跟住可以去約點畀錢and簽文件啦。Yeah，我馬上彈起，快過我前面個綠表買家搞掂走人。😆
天呀，我就咁係1分鐘內，決定咗一件人生大事。🙈其實我嚟到現場又轉咗一次軚，明明我嘅priority 2/3都未賣出，但就揀咗priority 13，咁我覺得我前日排得唔好，係現場收咗風，馬上變，因為我係善變的女人。😬
同埋，真係覺個揀樓櫃位個職員人美心善，提點我唔知FPS用唔用到，就唔好試，嘥時間，不如直接全數買本票啦。又好，反正我知樂富啲銀行買居屋用嘅本票，都免手續費。
(時值12:25未到)我跟手去中銀買本票，無乜人，所以過程都好快。（我係大半年前就準備咗中銀戶口，真係籌劃咗好多嘢）
買完本票12:45未到，仲可以吔個靚飯，下晝2點至返去會面&簽臨約。
會面仲搞笑，見到⋯⋯唔多講了，依家嘅我不便透露太多。反正就大概3:10pm簽完嘢，仲要再等電話拎文件。
3:41pm call咗我話可以拎文件，但結果等到成4:15pm至畀到我，最後係成4點半至離開揀樓中心。
今日就係咁，都無蝦碌嘢，係我全程比較忙覆人，同人報告我嘅進展。😆
好了，我嚟緊嘅大計，係要諗下點裝修我嘅"虎穴"。
😊😊😊
01:06, 1 Aug 2025
